UMVA prexy nanghinaot sa bag-ong tuig

Gipanghinaot karon ni United Market Vendors Association (UMVA) president Carmen Borja nga mamahimong malinawon ang pagsaulog sa pasko ug ang umaabot nga pagsugat sa bag-ong tuig 2010.
Kini ang pangandoy nga gilauman sa presidente sa market vendors sa Cogon sa interbyu sa Birada News Daily bag-ohay pa lamang.
Butyag pa niini, nga angayan nga saulogon ang pasko nga malinawon og dili ipatigbabaw ang kainit sa ulo aron malikayan ang dugoon nga panghitabo.
“Dili ang kainit sa ulo ang atong ipatigbabaw aron makalikay kita sa kagubot og atong masaulog ang pasko nga malinawon ug malipayon,” pamahayag ni Borja.
Ang UMVA nga nagsilbing gobyerno sa merkado sa Cogon mipasalig usab nga ilang panalipdan ang interes sa ilang mga pumapalit og dili usab nila tugtan ang ilang mga sakop nga mosakay sa panahon pinaagi sa pagpasaka ug insakto sa ilang mga produkto aron usab magpabilin ang maayong relasyon tali kanila nga mga negosyante og customer.
“Ako usab nga gihangyo ang atong mga miyembro nga ato usab imintinar ang atong relasyon sa atong mga suking pumapalit aron dili usab kita nila masawayan o reklamohan sa atong mga baligya,” dugang pa ni Borja.
Si Borja nagsilbing inahan sa mga vendors sa merkado sa Cogon gikan sa pagkapili niining presidente sa 2008 ug naglaum nga iyang humanon ang iyang mga gisugdang kaayuhan sulod sa cogon public market sa dili pa matapos ang iyang termino sa tuig 2013.
Tipik sa iyang mga programa mao ang paghinlo sa merkado sa mga batang gumon sa rugby, paghatag kanila ug kahigayonan nga mag-usab pinaagi sa pagtabang kanila nga mamahimong responsableng mamaligyaay og dina na manguotay u gang pagpakgang sa mga anomaliya sa maong merkado, sama sa pagpamaligya og mga pwesto ug uban pa.
Pagpapha sa mga batang gagmay nga maoy gihimong paon sa mga kawatan aron mamiktima sa mga mamaligya’ay ug mamalitay sa merkado sa cogon. Pagsuporta sa buhatan sa City Economic Enterprise Department kon CEED sa ilang mga programang ipatuman sa maong merkado nga subay sa ilang kagustuhan nga mga vendors nga makahatag ug kaayuhan sa ilang mga suking pumapalit.
“Ako pud nga gipasalamatan si Mr. Frederico ‘Ding’ Gempesaw ang atong manager sa CEED sa iyang suporta sa atoa ug sa akong tanan nga mga miyembro. Ug ako nanghinaut nga magpadayon ang ilang tabang kanako pinaagi sa pagsuporta sa atong mga programa alang sa kaayuhan natong tanan ug dili sa pipila lamang,” panapos ni Carmen Borja presidente sa United Market Vendors Association kon UMVA sa merkado sa Cogon. Rey B. Cabaraban

Helper sa DPWH gidunggab patay

TALAKAG Bukidnon--Patay ang usa ka helper sa truck sa Department of Public Works and Highway kon DPWH human gidunggab ug gitigbas alas 9:20 ang takna sa buntag niadtong Domingo Disyembre 20 sa Barangay Tikalaan, Talakag, Bukidnon.
Ang biktima giila nga si Duran Magay, hingkod ang edad, ulitawo ug molupyo sa Sitio Malunong, Barangay Basak sakop ning lungsod.
Gikabutyag nga nakita na lamang ang biktima nga nagbuy-od ug wala nay kinabuhi human gidunggab og gitigbas sa wala mailhing suspek sa Barangay Tikalaan.
Ang biktima nakaangkon ug samad sa iyang kilid ug tinigbasan sa nagkadaiyang parte sa iyang kalawasan hinungdan sa iyang kamatayon.
Si SPO1 Benjamin Gallentes, imbestigador sa Talakag Police Station mibutyag nga padayon usab ang ilang gihimong imbestigasyon sa maong kaso.
“Ato pa, nga gi-imbestigar ang maong hitabo aron matumbok ang responsable ug kapasakaan sa tukmang kaso,” pamahayag niini sa Birada News Daily.
Gimando usab ni Police Senior Inspector Adolfo Mercado hepe sa kapolisan sa Talakag, ang masusing imbestigasyon aron masulbad ang maong kaso. Rachel C. Moral PPCRV Talakag

Lolo gidunggab sa kainom

Maayong pagkasamad-samad sa tinae sa usa ka 62 anyos nga lalaki human giluba sa iyang kainom alas 10:30 ang takna sa gabii niadtong Lunes sa lungsod sa Talakag, probinsiya sa Bukidnon.
Ang biktima giila nga si Cosme Peligrino, 62 anyos, minyo ug molupyo ning maong lungsod.
Nasayran gikan ni Police Inspector Arnulfo Mercado, hepe sa kapolisan ning lungsod nga gikabikil sa maong biktima ang iyang kauban og inom hinungdan sa pagluba ngadto kaniya.
Ang biktima nakaangkon ug tulo ka samad sa iyang tiyan diin gikabutyag nga maayong pagkasapon sa iyang tinae ug duha ka mga samad sa iyang siko.
Dali usab nga misibat ang nasangpit nga suspek human sa maong hitabo, og wala usab masayri sa pamilya sa biktima ang pangalan niini ug ang motibo sa pagpanunggab.
Kasamtangan gipailalom karon sa kapolisan ning
lungsod ang maong kaso. Rachel C. Moral PPCRV Talakag

15 anyos kritikal sa bala

Talandugon ang kahimtang sa usa ka 15 anyos nga batang babaye human maigo ang likod niini sa saag nga bala sa armas.
Ang insidente nahitabo ala 1:00 ang takna sa kadlawon sa Barangay Lirongan, Talakag, Misamis Oriental.
Samtang biktima giila nga si Jasmin Andamon, ug molupyo sa nasangpit nga barangay.
Sa imbestigasyon sa mga sakop sa kapolisan sa maong lungsod nasayran, nga dunay disko nga gipahigayon sa maong barangay gumikan kay kadlawanan usab sa ilang pangilin sa dihang sunod sunod ka mga buto sa armas ang ilang nabati.
Nakita na lamang ang usab mga mihagba ang biktima nga nagkadugo, ug daling gidala sa tambalanan.
Nasayran nga ang biktima nakaangkon og samad sa iyang likod nga miresulta sa iyang talandugon nga kahimtang sa Northern Mindanao Medical Center.
Kasamtangan nga gipailalom sa operasyon ang nasangpit nga bata, aron makuha ang bala nga mitaop sa likod sa maong biktima. Rey B. Cabaraban