Mister nakiglalis ni misis, giluba

Maayong pagkahiwa sa bukton sa usa ka bana human giluba sa iyang asawa alas 5:10 ang takna sa hapon sa sityo Tibasak, Barangay Macasandig ning syudad sa Cagayan de Oro.
Ang biktima giila nga si Aldrin Simbajon, 25 anyos og molupyo sa nasangpit nga dapit. Gitumbok usab nga suspek ang asawa sa biktima nga maoy miluba ngadto kaniya.
Sa imbestigasyon sa Macasandig Police Station 9 nasayran nga nagkalalis ang biktima ug iyang asawa gumikan sa problema sa pamilya dayon mikuha og kutsilyo midunggab ngadto kaniya.
Si Police Senior Inspector Rowenico Doong, Sr., hepe sa police station 9 sa Macasandig mibutyag nga ilang gidala sa Northern Mindanao Medical Center ang maong biktima aron katambalan.
Samtang ang maong akusadong asawa ang milayas usab human sa maong hitabo.
Ning pagbalita, padayon nga giatiman sa mga doctor ang maong biktima, samtang giandam usab ang kaso batok sa nasangpit nga ginang.

Lolo nasungag sa van, tiil natanggal

MAAYONG pagkaputol sa tiil sa usa ka 50 anyos nga lolo human mapunggit sa usa ka van alas 6:15 ang takna sa hapon kagahapon sa Barangay Luz Banzon, Jasaan, Misamis Oriental.
Ang biktima giila nga si Jaime Maputol, 50, minyo og molupyo sa nasangpit nga barangay sa maong lungsod.
Sa imbsetigasyon sa mga ginsakpan sa kapolisan sa Jasaan Municipal Police Station nasayran nga gipunggit sa usa ka van ang maong biktima nga sakay sa iyang kaugalingon nga motorsiklo hinungdan nga maayong pagkalagpot asa tiil niini dihang naputol.
Dali usab nga misibat ang akusadong drayber ug gibiyaan ang biktima nga nadaro daplin sa dalan human sa maong hitabo.
Gidala gilayon ang maong biktima sa Northern Mindanao Medical Center aron katambalan ug mauli ang nahuslo nga tiil niini gumikan sa maong hitabo.
Kasamtangan nga giatiman pa sa mga doktor sa nasangpit nga balay tambalanan ang maong biktima.