UMVA prexy nanghinaot sa bag-ong tuig

Gipanghinaot karon ni United Market Vendors Association (UMVA) president Carmen Borja nga mamahimong malinawon ang pagsaulog sa pasko ug ang umaabot nga pagsugat sa bag-ong tuig 2010.
Kini ang pangandoy nga gilauman sa presidente sa market vendors sa Cogon sa interbyu sa Birada News Daily bag-ohay pa lamang.
Butyag pa niini, nga angayan nga saulogon ang pasko nga malinawon og dili ipatigbabaw ang kainit sa ulo aron malikayan ang dugoon nga panghitabo.
“Dili ang kainit sa ulo ang atong ipatigbabaw aron makalikay kita sa kagubot og atong masaulog ang pasko nga malinawon ug malipayon,” pamahayag ni Borja.
Ang UMVA nga nagsilbing gobyerno sa merkado sa Cogon mipasalig usab nga ilang panalipdan ang interes sa ilang mga pumapalit og dili usab nila tugtan ang ilang mga sakop nga mosakay sa panahon pinaagi sa pagpasaka ug insakto sa ilang mga produkto aron usab magpabilin ang maayong relasyon tali kanila nga mga negosyante og customer.
“Ako usab nga gihangyo ang atong mga miyembro nga ato usab imintinar ang atong relasyon sa atong mga suking pumapalit aron dili usab kita nila masawayan o reklamohan sa atong mga baligya,” dugang pa ni Borja.
Si Borja nagsilbing inahan sa mga vendors sa merkado sa Cogon gikan sa pagkapili niining presidente sa 2008 ug naglaum nga iyang humanon ang iyang mga gisugdang kaayuhan sulod sa cogon public market sa dili pa matapos ang iyang termino sa tuig 2013.
Tipik sa iyang mga programa mao ang paghinlo sa merkado sa mga batang gumon sa rugby, paghatag kanila ug kahigayonan nga mag-usab pinaagi sa pagtabang kanila nga mamahimong responsableng mamaligyaay og dina na manguotay u gang pagpakgang sa mga anomaliya sa maong merkado, sama sa pagpamaligya og mga pwesto ug uban pa.
Pagpapha sa mga batang gagmay nga maoy gihimong paon sa mga kawatan aron mamiktima sa mga mamaligya’ay ug mamalitay sa merkado sa cogon. Pagsuporta sa buhatan sa City Economic Enterprise Department kon CEED sa ilang mga programang ipatuman sa maong merkado nga subay sa ilang kagustuhan nga mga vendors nga makahatag ug kaayuhan sa ilang mga suking pumapalit.
“Ako pud nga gipasalamatan si Mr. Frederico ‘Ding’ Gempesaw ang atong manager sa CEED sa iyang suporta sa atoa ug sa akong tanan nga mga miyembro. Ug ako nanghinaut nga magpadayon ang ilang tabang kanako pinaagi sa pagsuporta sa atong mga programa alang sa kaayuhan natong tanan ug dili sa pipila lamang,” panapos ni Carmen Borja presidente sa United Market Vendors Association kon UMVA sa merkado sa Cogon. Rey B. Cabaraban

Helper sa DPWH gidunggab patay

TALAKAG Bukidnon--Patay ang usa ka helper sa truck sa Department of Public Works and Highway kon DPWH human gidunggab ug gitigbas alas 9:20 ang takna sa buntag niadtong Domingo Disyembre 20 sa Barangay Tikalaan, Talakag, Bukidnon.
Ang biktima giila nga si Duran Magay, hingkod ang edad, ulitawo ug molupyo sa Sitio Malunong, Barangay Basak sakop ning lungsod.
Gikabutyag nga nakita na lamang ang biktima nga nagbuy-od ug wala nay kinabuhi human gidunggab og gitigbas sa wala mailhing suspek sa Barangay Tikalaan.
Ang biktima nakaangkon ug samad sa iyang kilid ug tinigbasan sa nagkadaiyang parte sa iyang kalawasan hinungdan sa iyang kamatayon.
Si SPO1 Benjamin Gallentes, imbestigador sa Talakag Police Station mibutyag nga padayon usab ang ilang gihimong imbestigasyon sa maong kaso.
“Ato pa, nga gi-imbestigar ang maong hitabo aron matumbok ang responsable ug kapasakaan sa tukmang kaso,” pamahayag niini sa Birada News Daily.
Gimando usab ni Police Senior Inspector Adolfo Mercado hepe sa kapolisan sa Talakag, ang masusing imbestigasyon aron masulbad ang maong kaso. Rachel C. Moral PPCRV Talakag

Bag-ong minyo gitad-tad sa tag-iya sa gipuy-an patay

TALAKAG Bukidnon--MAAYONG pagkagutad-gutad sa lawas sa usa ka 22 anyos nga lalaki human gitad-tad ang lawas niini sa tag-iya sa iyang giabangan nga balay sa Sitio Latid, Barangay San Antonio, ning lungsod.
Ang nasangpit nga pagpatay nahitabo alas 3:00 ang takna sa hapon niadtong Lunes Disyembre 21.
Ang biktima giila ni PO2 Allan Aznar sakop sa Talakag Police Station nga si Rico Painato, 22 anyos, minyo ug trabahante sa Dole sa ning lungsod.
Sa imbestigasyon sa kapolisan ning lungsod nasayran, nga aduna nay bikil daan ang biktima ug ang tag-iya sa balay nga iyang gipuy-an nga miresulta sa maong hitabo.
Giila ni Police Senior Inspector Adolfo Mercado ang suspek nga si Menesio Estan, 60 anyos, minyo sa nasangpit nga dapit.
Nasikop ang maong suspek human dali usab nga miresponde ang mga sakop sa kapolisan ning lungsod sa maong lugar diin nahitabo ang maong kremin.
Nasayran nga pauli na gikan sa trabaho ang biktima sa dihang giatangan kini sa suspek nga armado sa taas nga sundang dayon dunggab sa biktima.
Ang biktima nakaangkon ug samad sa nagkadaiyang parte sa iyang lawas nga maoy hinungdan sa iyang kamatayon.
Gawas usab niini giayo matud pa ug tad-tad sa maong akusado ang lawas sa biktima hinungdan sa pagkaguhay-guhay usab niini.
Nakuha usab gikan sa maong akusado ang usa ka 30 pulgadas nga sundang nga nagkadugo pa nga maoy iyang gigamit sa pagpatay sa maong biktima.
Ang asawa sa maong biktima nga buros pa lamang, dili makadawat sa gidangatan sa iyang bana ug andam usab sa pagpasaka ug kaso batok sa maong akusado nga detinado karon sa Talakag Municipal Jail sa 422 Philippine Constabulary Company sa Camp Suarez, Barangay Poblacion ning lungsod. Rachel C. Moral PPCRV Talakag